原本打算進軍樂壇的諸葛紫岐，因為老公薛嘉麟（圓圖）大權旁落，歌星夢被迫叫停。
探熱針
燉冬菇 老爺揸 Fit老公失勢 諸葛紫岐衰多口
當年陳法拉老公、 Neway大少薛世恒失寵，由細佬薛嘉麟坐正做揸 fit人，統領家族的唱片業務；老婆諸葛紫岐最風騷，叫老公做「主席哥」，甚至以「主席夫人」身份，加把嘴插手公司大小事務。
新人事新作風，並非人人頂得順，公司內不少老臣子劈炮無眼睇；薛家老師薛濟傑收到風後，決定出關重掌業務，二少被「燉冬菇」只能做掛名主席，諸葛紫岐更加無得留低，出碟大計亦胎死腹中。
有名無實
Neway二少奶諸葛紫岐早前出席馬會活動，繼續剃「大家嫂」陳法拉眼眉，叫自己老公薛嘉麟做「主席哥」，盡顯風騷，可惜歡樂時光過得特別快，薛嘉麟主席位都未坐暖，已經失勢。「二少坐 咗大少個位之後，話而家樂壇捧歌手 嘅做法唔 work，要用新方法，可惜幾年落 嚟，一樣冇起色，班舊伙記好多都頂唔順，走得嘅都走晒。」知情人士說。
Neway旗下的公司包括星娛樂、 Neway Star，加埋原本有十多名員工，但去年開始陸陸續續離職，幾乎走剩一半，「二少成日話要用新方法，但乜 嘢新方法又講唔出，之後連佢老婆諸葛都入埋 嚟指指點點，早排仲幫 HotCha搞形象，乜都要插手，真係好難做。老薛生（薛濟傑）見公司走咁多人，知道管理一定出 咗好大問題。」知情者說。
Neway大老闆薛濟傑
關心妍深得大老闆薛濟傑歡心，生日會也有老闆撐場，一姐地位穩固。
諸葛紫岐老公薛嘉麟雖然工作不順利，但投資物業方面頻頻有動作，最近摸出上環信德中心西翼單位，未足四個月，賬面賺 170萬元。
冇得出唱片
跟日本環球唱片有合約在身的諸葛紫岐，一直希望約滿後加盟老公公司，插手管理層，無非為出碟工作鋪路，只可惜愈幫愈忙，更驚動老爺薛濟傑。眼見生意毫無起色，薛老爺先親自出馬邀請黃栢高（ Paco）加入 Neway做顧問，近月更逐步插手管理，重掌公司業務。
老公被架空，諸葛紫岐的歌星夢也無奈叫停，「本來佢已經開始籌備唱片，仲叫 咗王友良搵倖田來未個唱片監製幫手，計劃晒以組合形式出道，不過老爺唔准佢再搞公司 啲 嘢，惟有全部叫停。」大計泡湯，諸葛為「打圓場」，近日借支持中國反日為由，聲稱要擱置出碟計劃。
本刊記者曾一連數日，在 Neway的公司樓下等候，一直未見薛嘉麟返公司，即使上週三（十月三日）公司開例會，同樣無影。記者致電薛嘉麟，可惜至截稿前仍未親自回覆，其公司宣傳公關黃先生則表示，薛老先生一直是公司的顧問，對業務一向關心。
二少薛世恒一手發掘的 HotCha三缺一，雖然諸葛紫岐不再過問 Neway事務，但仍有協助二人的造型。
一度積極投入老闆娘角色的諸葛紫岐，幕前幕後的工作均主動參與，不過最近已甚少過問公司事務。
有份助大少薛世恒創立星娛樂的何哲圖（中），因為二少上台，而黯然離開，早前星煥娛樂，更撬走鍾嘉欣和大少奶陳法拉加盟。
記者在 Neway門外守候多日，始終未見薛嘉麟現身，未知是否身在外地。
每況愈下
薛家兩兄弟，因接管家族生意而暗鬥多年，薛老爺薛濟傑原打本給長子薛世恒大搞 Neway唱片公司，後來因為失寵俾細佬薛嘉麟坐正。不過二少接管後，未能把業績起死回生之餘，走勢更加每況愈下！
踢走 Regen
一朝天子一朝臣，曾跟大少薛世恒傳緋聞的 Hot Cha成員 Regen，一直深得大少寵愛，在二少接管公司後，被打入冷宮再食「無情雞」，結果要退出組合，執包袱去澳洲讀書。
炒吳日言
在大少年代加盟的歌手吳日言，遭二少清理門戶炒魷，慘變失業歌手。早前加盟王維基的 CTI，由歌手轉做演員。
睇漏 Chilam
張智霖是近年 Neway旗下最似樣的歌手，但早前約滿，公司竟無主動「留人」，失策。
鄭融 no show
留言列表
