城市打游擊

慳家黃金週

2012年10月11日 ~~ 第1179期 香港《壹周刊》

剛過去的「十一黃金週」，有接近一百萬人次的內地遊客訪港。一如以往，這批大陸客蜂擁至尖沙咀、銅鑼灣豪買名牌、化妝品和奶粉，但今年亦出現不少另類內地「驢友」（即慳皮）自由行來港，為了慳住宿費入住大嶼山貝澳露營區。
原來，不少內地網站標榜貝澳為「五星級營地」，大讚營區管理妥當、水清沙幼，鼓勵內地客免費享用設施，又指香港人質素高，出外遊玩時即使將行李放在營內亦非常安全，嫌車費貴，更可全日留守營區，到附近的沙灘摸蜆、撈魚充飢度日，結果，大批內地客攻陷貝澳，更將五十二個營位全數逼爆。
內地驢友白天觀光購物，晚上返營地休息，本地露營發燒友被迫瑟縮草叢沙地紮營，不滿又無奈。本刊國慶日直擊一家來自江西南昌縣的家庭，一行四人千里迢迢搭火車至深圳，再轉港鐵來港，直奔貝澳露營，但全日近乎零消費，自由行實情慳到盡！

10:20

內地自由行大軍殺入貝澳霸營位，香港露營發燒友無位紮營，雙方曾經發生口角，更有港人及外國人帳篷被人用刀割爛，第二天警員一早到場戒備，防止再起糾紛，氣氛緊張。 

10:40

黃女士與丈夫、女兒及母親在草地紮營一晚後，一早整裝待發，由丈夫擔任領隊，開始港九一日遊。 

12:10

乘東涌線殺出中環，第一站是 IFC商場內的蘋果旗艦店（右），新 iPad同 iPhone5拎上手睇足十分鐘，最終都係唔捨得買。路過畢打街鐘錶行睇金錶（左），以為會大破慳囊，結果，睇咗無五分鐘就走，堅持唔買！

12:40

一家人搭電梯上半山觀光，行到悶又見餓，即刻入超市歎冷氣之餘，順便買雪糕、牛奶同麵包，四十蚊有找，又餓又熱，全家人忍唔住即刻坐喺馬路邊醫肚。 

14:30

麵包食唔飽，經過擺花街蘭芳園，見門口排長龍應該口碑唔錯，一家人商量一會，決定幫襯！但黃女士似乎無諗到一個茶餐都要四十蚊，望住餐牌愁咗好耐，最後先決定叫幾個茶餐同飲品，埋單超過一百蚊，是全日最高消費！ 

19:40

行完中環再去尖沙咀，逛街市和百貨公司行足五粒鐘，仍然堅持齋睇唔買，捱到七點返歸。一家人堅決唔外出食晚飯，結果入東薈城超市買水果，等車時見餓亦無有怕，皆因一早隨身攜帶威化餅，食落都幾滋味。 

20:50

終於返到營區，見到前面營區有靚位剩，即刻唔執輸，成個帳篷搬過去霸位，安頓好就起爐煮飯烚菜當晚餐，邊食邊計劃翌日嘅慳皮行程。 

撰文：周潔媚
攝影：翁少陽