名人私生活
接見劉詩昆孫穎 83歲馬可斯夫人皇后生活
天價古董名畫
菲律賓前總統馬可斯夫人艾美黛，重返菲律賓再度活躍政壇，是現任的國會議員。身家豐厚的她，在菲律賓擁有多間豪宅，還不時在馬尼拉的一間頂樓豪宅接見外賓。今年十月初，在美國著名鋼琴大師 Van Cliburn引介下，與鋼琴大師劉詩昆及徒弟孫穎會面，本來只約好晚飯會見，熱愛音樂的馬可斯夫人跟劉詩昆志趣相投，結果吃足三餐，劉詩昆準備離開當天，更相約共進早餐，之後才到國會出席會議。
「馬可斯夫人間屋好似皇宮咁，佢收藏好多古董，其中一幅畢加索（ Picasso）嘅畫，估值超過二億美金，另一幅是米高安哲羅（ Michelangelo）作品，佢係意大利文藝復興時期的雕刻家同畫家，雕像舉世聞名，但油畫作品唔多，八五年馬可斯夫人以四百萬美金買入，但而家價值已達天文數字，難以估計。
「馬可斯夫人仲隨身攜帶一本好似字典咁厚嘅書，集齊晒佢咁多年來嘅新聞，每當佢講到有關嘅事，助理就自動揭去嗰頁俾我哋睇，好似美國登 咗咁多馬可斯貪污新聞，但又會用全版報紙恭祝佢生日。佢話佢喺美國有一百八十個戶口被凍結 咗，當中包括一個金礦，佢記得當年以三蚊美金一股買入，而家已經升值到一千九百七十元，不過俾美國政府凍結緊，打緊官司未攞得番。提起最著名 嘅三千對鞋，佢澄清話其實大部分係禮物，依家被國家充公收入政府機構，發晒霉。聽佢講完，我當時仲即時睇吓佢著咩鞋，都係著拖鞋啫。」孫穎坦言大開眼界。
劉詩昆與孫穎將珍藏多年，價值約三十萬的瑪瑙擺設，送給馬可斯夫人作為見面禮。
馬可斯夫人用來接見朋友的豪宅，飯廳擺放了不少古董珍藏，單是放在飾物櫃內的三座翡翠擺設，已經價值不菲。
在意大利餐廳晚膳後，馬可斯夫人將自製的新聞剪報放上枱，給他們講解內容。
放在客廳的米高安哲羅畫作，馬可斯夫人八五年以四百萬美金購入，由於他的畫作罕有在市場出售，價值難以估計。
炒賣名畫市場復甦，馬可斯夫人擁有的畢加索名畫亦升值至約二億美金。
劉詩昆跟同在一九五六年獲獎的 Van Cliburn（前左）本約好舉行演奏會， Van因得了癌症未能履行諾言，但就介紹他早年認識、一樣愛音樂的馬可斯夫人給劉詩昆認識。
合作推動音樂
「馬可斯夫人好鍾意音樂，認識唔少音樂家，見面嗰日，佢安排菲律賓大學音樂學院院長一齊傾偈，因為佢好想將菲律賓青少年音樂水平提升。我哋出年會同佢哋喺暑假一齊合作『盛樂遊國際郵輪之旅 2013』。食完兩餐飯，佢覺得我好啱傾，再約第二日七點半食早餐，我哋都冇佢咁好精力，要改八點半。馬可斯夫人係一個有智慧嘅人，我記得佢話以前遇到嘅一切不幸，係出於妒忌，佢話憎恨你嘅人唔會傷害你，因為佢哋根本唔想見到你，但妒忌你嘅人就要提防，因為殺傷力最大。」孫穎說。
1989年逝世的前總統馬可斯，未逃亡美國前，不時帶住夫人出席元首級活動。
馬可斯夫人送給劉詩昆自家出品的環保領呔，又送孫穎瑪瑙頸鏈，二人即時戴上；旁為菲律賓大學音樂學院院長。
重奏定情樂曲
馬可斯夫人今時今日依然有權有勢，生活猶如女王，有四個保鏢廿四小時保護，兩個護士以及兩個助理貼身服侍，每次出門都要開兩部車。首次跟劉詩昆和孫穎見面的第一頓晚餐，馬可斯夫人特別訂了名貴意大利餐，主菜黑松露配龍蝦蘆筍，都是清淡菜式。翌日再約兩人在半島酒店晚飯，其間劉詩昆特別將她跟馬可斯定情樂曲即場重新編排演繹，令馬可斯夫人當場感動到眼濕濕。
已故中共主席毛澤東給馬可斯夫人「錫手」作見面禮，馬可斯夫人向劉詩昆等透露：「我返去俾馬可斯審問，話係毛澤東主動定係我主動，總之總統好嬲。」
Van Cliburn與年輕時的馬可斯夫人合照。
留言列表
