面授機宜
在周二（ 4日） TVB台慶宣傳活動上，樂易玲搭住黎芷珊膊頭傾咗一輪，黎芷珊點點頭，似若有所得，吳綺莉亦在旁聽實。
滾熱辣
吳綺莉被商台炒屈到病 黎芷珊縮沙拒接棒
上周五（ 30日）吳綺莉突然收到商台通知，叫她開咪開到 12月 17日，之後就由黎芷珊「取替」她擔任《 1圈圈》主持之職。突然被商台炒魷，吳綺莉向傳媒哭訴，指被人陰招逼走。本周一（ 3日）晚，嬲到火燒心的她更屈到病，發燒漏夜入院睇急症，禍不單行！
TVB得悉事件後，樂易玲急召吳綺莉回公司了解，兩大巨頭樂易玲與余詠珊更齊齊傾足半小時開解吳。至於原本頂替吳綺莉的黎芷珊，眼見風頭火勢，亦推辭唔做《 1圈圈》主持。
吳綺莉（ Elaine）突被商台炒魷，心情恍惚之下，周日（ 2日）出席活動時已不慎夾爆中指，周一（ 3日）再因發高燒搞到入大埔那打素醫院睇急症。吳綺莉表示：「我今日晏晝突然發高燒，成個人頭暈暈。好多年未試過發燒，屋企附近夜晚冇診所，惟有搵鄰居車我去醫院，打 咗針好 啲啦。」在醫院逗留約一小時後，吳綺莉便回家休息。
翌日下午 TVB搞台慶宣傳，高層樂易玲急召吳綺莉返公司了解，同場還有余詠珊及被傳頂替吳綺莉做《 1圈圈》主持的黎芷珊，四個女人圍埋密密傾足半小時。樂易玲說：「我知道後都覺突然，因為未接過商台投訴話吳綺莉表現差，作為經理人公司會全力支持佢，我會了解發生乜事先。（陳志雲有冇同你聯絡？）我覺得唔關陳生事，佢亦冇打俾我。」由於 TVB是吳綺莉經理人，當記者問到會否向商台追討賠償，樂小姐表示會先了解再作下一步行動。不過她強調已安排吳綺莉二月開新劇。
齊傾密偈
同樂易玲傾完，黎芷珊又再同余詠珊密斟，吳綺莉亦向余訴苦。
Terry（梁泰來）指冇同陳志雲傾過吳綺莉被炒一事，對於芷珊幾時開咪？他說：「傾緊啫！」
3/12睇急症
發高燒的吳綺莉離開醫院時，目定口呆，精神甚差。
等半粒鐘
在鄰居的陪同下，吳綺莉在醫院等看醫生，她不時流露痛苦表情。
堅拒留院
吳綺莉從診症室打完針出來，只見她樣子疲倦，但堅持唔留院。
芷珊怕俾人玩
被指頂替吳綺莉的黎芷珊，亦坦言拒接棒：「我已經推 咗商台，對我 嚟講依家唔係一個好 timing。（是否因吳綺莉被炒？）好多因素影響 嘅！」
芷珊縮沙，皆因是有人見過鬼怕黑。知情者話︰「最初 Terry（陳志雲新寵，《 1圈圈》主持梁泰來）搵芷珊時，芷珊真係好有興趣，加上商台話肯就佢時間。但後來收到風，知道商台有人隻手遮天玩 嘢，嗰個人依家個勢咁好，冇理由要入商台做箭靶。有高層更勸芷珊唔做比較好。有辦你睇，吳綺莉入商台後俾人插到出血，即使佢搵到陳家瑛、葉玉卿、陳百祥同王維基做嘉賓都要俾人逼走。前車可鑑，芷珊梗係縮啦！」
對於被炒，吳綺莉寸爆：「我從來都唔會打俾陳生講是非，亦因為婦人之仁，俾機會 啲人搞小動作陰我。我只係想講，多謝 TVB支持我。（係咪覺得 Terry唔喜歡你？）人夾人緣，由頭到尾同佢都只係同事關係。（覺唔覺陳生欠你一個交代？）佢有佢難處，都唔關佢事。」
炒魷事件至今，陳志雲擺明避鋒頭。周二晚其愛將 Terry代表他出席香港電視活動時，記者問到他是否炒吳綺莉的刀手，他避重就輕說：「係公司意思，唔係炒，只係終止合作。」問到有冇向陳志雲交代，他就話冇，因為陳生有好多 嘢做。總之陳志雲似乎避得就避。至於芷珊幾時開咪， Terry則說：「傾緊啫，都未落實。」
陳志雲八月時找吳綺莉入商台，與愛將 Terry及楊崢一起做節目，炒魷事件發生後，至今陳志雲仍無聯絡吳綺莉及 TVB交代事件。
香港電視公關 Jessie指吳綺莉在十一月中找王維基訪問，王覺得吳綺莉有誠意，故俾面做訪問。對於吳被炒， Jessie說：「訪問都會照做嘅，因為應承咗。」
禍不單行
吳綺莉入行接近廿年，為人低調，最轟動便是誕下小龍女吳卓琳，去年由上海回流香港，再次活躍娛樂圈，是非不絕。
8月尾 取代查小欣
與陳志雲愛將 Terry擔任新節目《 1圈圈》，節目時段更取代查小欣。不過，她們出席商台周年晚宴時，仍大方合照。
22/11 被傳「車震」
《雷霆掃毒》劇照
網站及 Whatsapp瘋傳《雷霆掃毒》男女演員在上水八鄉「車震」，矛頭直指鄧梓峰及吳綺莉，鄧梓峰身在英國拍《衝上雲霄 2》聲言發律師信，吳綺莉更舉手發誓冇做過。
30/11 突被炒魷
早上開咪前突接被炒通知，吳綺莉完成工作後便向傳媒哭訴被利用，翌日出席活動時不慎夾爆中指，之後又發高燒要看急症。身為基督徒的她說：「當擋煞囉！」 
留言列表
