博出位
提早過聖誕
雖然距離聖誕節仲有兩星期，但香港唔少商場同店舖已經掛滿聖誕裝飾，一班藝人亦快人一步，喺微博傳送節日氣氛，實行提早過聖誕。
容祖兒風騷
Dry爆嘅容祖兒，終於脫離剩女行列，同劉浩龍行緊蜜運，難怪有情人嘅佢，喺微博以過來人身份勉勵網友「要快樂」。不過祖兒頂綠帽，似乎適合何韻詩戴多啲喎！
家燕姐誇張
日日喺電台開咪嘅薛家燕，早前就着到成身紅噹噹做節目，竟然被拍檔阿 Bob寸佢着得早咗啲。事後家燕姐解釋咁着係迎節，但呢款裝扮，其實更加適合農曆新年。
名媛溫馨
《名媛望族》嘅大太太韓馬利、三姨太江美儀，同埋劇中一班仔女，特登夾埋着晒聖誕裝宣傳。全家齊心兼場面溫馨，但最搶眼都係江美儀隻狗冬冬。如果冬冬肯客串《名媛》，套劇收視會冇咁差。
楊秀惠收藥
楊秀惠隻金龜俾沈卓盈撬走，有人就送咗一盒朱古力同止痛藥俾佢做聖誕禮物。大時大節，孤零零，冷冰冰，食定藥都啱嘅！
豪嫂詐嬌
陳豪同陳茵媺打得火熱，但陳茵媺今年第一份聖誕禮物偏偏係 fans送贈嘅人造頸鏈，難怪陳茵媺急不及待要將份禮物放上微博，擺明向陳豪詐嬌啦！
你幾時送呀？﹙設計對白﹚
我識做㗎喇！﹙設計對白﹚
全站熱搜
留言列表
