韓紅
韓妹咒離婚 PSY馬上瘋
出道 12年，已經 34歲 嘅韓國阿叔歌手 PSY（朴載相），憑膠歌《江南 Style》熱爆全球， MV响 YouTube點擊率累積超過 3億。
個樣似陳奕迅加導演錢國偉，巨腩騎馬舞加埋洗腦膠歌，居然有本事打入美國 Billboard細碟榜亞軍， PSY叔叔仲話如果攞到冠軍，會除上身衫跳騎馬舞酬賓。
可能你未必想睇佢裸跳，但係班韓妹個個聽到流晒口水，早前有韓國網站票選「你最想哪個明星回復單身？」 06年已經做 咗老襯，家有一對孖女 嘅 PSY叔叔，居然高票當選，得票率比起排第二 嘅張東健高出 27個百分點。全城韓妹都想生擒 PSY叔叔，阿朴太，你小心 啲好！
食大麻
阿爺 嗰代已經有錢 嘅 PSY叔叔，老豆朴元浩又係上市公司 CEO，含住成條金鎖匙出世，屋企有閒錢可以俾佢去美國名校波士頓大學讀書，再去柏克萊音樂學院讀音樂。 2000年， 23歲 嘅 PSY叔叔正式殺入樂壇，處男大碟反應好，可惜 01年因為食大麻被捕形象扣晒分。 03年 PSY叔叔入伍當兵，因在服兵役期間違規開騷， 07年要重新入伍，令佢事業受重創。
06年 10月 14日 PSY叔叔同女朋友拉埋天窗，太太之後幫佢生 咗對孖女，全職做家庭主婦。
因為服兵役期間開騷， PSY被裁定違規， 07年要再做多一年阿兵哥，慘！
柏克萊音樂學院學生證， PSY叔叔原來由細到大都冇瘦過，初入樂壇個樣，充滿大陸古惑仔 Style。
多女爭
到 10年， PSY叔叔捲土重來，推出第 5張大碟《 PSYFIVE》叫好叫座，當然令佢更上幾層樓主因，係佢 7月 15日面世 嘅第 6張個人專輯《 PSY6甲》，入面主打歌《江南 Style》，配騎呢騎馬舞，紅到去美國，我諗佢發夢都估唔到有今日。唔靚仔，仲有大肚腩， PSY叔叔勝在能歌善舞，《江南 Style》由曲詞編監舞都由佢一手包辦，韓妹個個 Like爆，風頭已經蓋過晒 BIGBANG同 SJ。近排有網站搞「你最想哪個明星回復單身？」投票， PSY叔叔同韓國女神全智賢，齊齊榮登人夫人妻 NO.1，嚇死人。
PSY叔叔同陳奕迅真係好似樣，我真心想睇佢兩個可以一齊跳《江南 Style》。
YouTube點擊率 3億（紅圈）， 300萬個 Like，唔破健力士世界紀錄先出奇！
你冇眼花，呢個係美國 Billboard細碟榜， PSY叔叔排第二，個個睇死排第一 嘅樂隊 Maroon 5會落榜，我都有同感！
食住上
早排去美國做宣傳， PSY叔叔居然可以 响「 MTV音樂錄影帶頒獎禮」上表演，亞洲歌手史無前例。（路透社）圖片
9月初， PSY叔叔打鐵趁熱去美國進行為期 3個禮拜 嘅宣傳，一口流利英文，仲上節目教鬼佬鬼婆跳騎馬舞，連湯告魯斯、 Britney Spears、 Justin Bieber都話要學跳。
一曲成名， PSY叔叔除 咗打入美國 Billboard細碟榜亞軍，《江南 Style》更連續 10日成為 iTune榜第一位，加埋 YouTube 3億點擊率，大大個歐美市場， PSY叔叔決定籌備英文唱片強攻，由於冇時間造過批新歌，唯有舊歌新詞頂住先，事關外界預計 PSY叔叔憑以上戰績，夠晒資格入圍明年舉行 嘅「第 55屆格林美音樂頒獎禮」，角逐「最佳新人獎」，如果真係俾佢攞到，陳奕迅，我戥你唔抵！
PSY叔叔來頭
姓名：朴載相
英文名： PSY（ Park Jai Sang）
學歷：美國波士頓大學及柏克萊音樂學院
所屬公司： YG Entertainment，與男團班霸 BIGBANG同門。
家庭狀況： 2006年結婚，育有一對孖女。
威水戰績：《江南 Style》 YouTube點擊率達 3億，創健力士紀錄。
打入美國 Billboard細碟榜亞軍
打入英國細碟榜季軍
全球 30個國家 iTune銷售榜冠軍
明知自己唔靚仔，大碟封面只會用漫畫代替， PSY叔叔有份做設計，嗯....其實好稻中兵團。
留言列表
