大班鄭經翰本來有意成為香港數碼廣播之父，最後卻因股東爭拗而封咪，再變賣股份，電台前途仍然生死未卜。（李育明攝）

壹號頭條

大班半價賣電台甩身

2012年10月04日 ~~ 第1178期 香港《壹周刊》

今年九月二十一日正式啟播的數碼廣播（ DBC），開台未夠一個月被迫執笠玩完。創辦人兼行政總裁鄭經翰早前高調稱被中聯辦政治打壓，一時民怨沸騰，千人力撐勢要「光復電台」。
豈料近日大班卻口風急轉彎，指有中間人傳話「唔係中聯辦搞你」，大班將矛頭轉向特首梁振英。大班轉軚放生中聯辦，原來鋪路賣電台股份甩身，他上週主動提出以半價約四千萬元，將四成股份賣給黃楚標等股東。
黃楚標表示還在考慮是否買入股份：「佢（大班）屈得就屈，之前又話係中聯辦打壓，我都搞唔清係受中聯辦定係梁振英影響，我只知道我係受我個銀包影響！」

中秋節當日，數碼電台舉行開放日，近千名市民到數碼港支持倒數廣播的 DBC。 DBC大賣溫情，進行七小時的馬拉松節目「我們在 DBC的日子」，邀請現任及已離職的 DJ分享感受，又播溫情歌曲《一起走過的日子》。
「而家個個人咁支持我，我仲想 DBC玩完？……我哋仲要睇到香港有呢一日，仲有番呢個價值觀。我哋仲有使命感，所以要撐落去。」大班發表一番肺腑之言，感動了到場的市民捐出合共十萬元支持 DBC繼續發聲。


電台主席黃楚標因不滿電台燒銀紙，不肯注資，與大班在董事局內展開一場激鬥。（《蘋果日報》圖片）


大班（右）與股東何國輝（左）上週四收到法庭禁制令，禁止他對外披露董事局會議內容，他表示為免惹官非會主動封咪，但轉過頭週二又開咪講南Ｙ島撞船事件。（網上圖片）

幕後黑手非中聯辦

一直宣稱被中聯辦打壓的鄭經翰，上週六突然向報章改口，指中聯辦是幕後黑手的說法，是誤中副車，「應該唔關中聯辦事。」他又將矛頭指向梁振英，指梁振英繼○二年利用行政手段阻商台續牌後，再次打壓大班台：「而家表面證供成立，係可以提堂㗎喇，就係呢個梁振英封殺 DBC。」但他轉頭又補多句：「但係唔會有實質嘅證據，永遠唔會有證據。」
DBC另一股東黃楚標，曾被大班指為中聯辦打手，黃楚標大吐苦水：「我嗰日飛去北京，喺飛機睇報紙見到，心諗乜原來又唔係我打壓嗱？（大班）唔好將經濟問題扯去政治問題！」
不過，中方干預 DBC運作仍然時有聽聞，早前便有人向傳媒放料，透露去年 DBC董事局會議上，曾商討是否聘用商台名嘴李慧玲作主持，與會的黃楚標嫌李慧玲太惹火，稱中聯辦阿彭（彭清華）傾過唔想鬧咁多政府。
黃楚標直認中聯辦曾對 DBC表態，他說：「佢（中聯辦人士）係有話過呢啲係你哋嘅事，你哋覺得（電台）做得過就做啦，做唔過就唔好做，但就希望唔好鬧咁多啦！」身為政協的黃楚標，愛國行先，認為 DBC要少批評內地：「我有講過河水不犯井水，大陸事干預少啲，你要鬧如果鬧錯點算？講番香港事，你批評政府我哋無人反對！」
但黃堅稱已處處開綠燈給大班，他說：「你睇吓佢（大班）之後搞個復仇者聯盟，搵黃毓民、鄭家富，我有無阻止佢開咪？大班仲惹火過李慧玲啦，我一開始都俾佢開咪！」黃楚標願意配合，說到尾又是錢作怪，相信大班諗頭搵到錢，「我哋純粹信佢，佢話會有廣告！」 

減價賣股

記者致電大班問中聯辦打壓 DBC一事，他繼續為中聯辦澄清，他說：「都係中聯辦有份，不過幕後黑手應該係梁振英。」由中聯辦到梁振英， DBC仍然以被打壓的自由平台自居。
大班口口聲聲說要撐下去，但他卻金蟬脫殼。上週五在《風波裡的茶杯》節目中自爆，會在翌日的 DBC董事會提出出售股份：「我同何國輝、夏佳理亦都俾咗一個 offer佢哋（黃楚標陣營）啦，一個提案，就係我哋半價折讓我哋啲股權。」
他之後接受報章訪問，說已無法撐下去，日日瞓得幾個鐘。他又罵黃楚標日日搵律師玩嘢玩到殘，晚晚發律師信給他，令他意興闌珊。黃楚標八月至九月發出三份入稟狀告大班，包括：要求查閱數碼台的賬目、向法庭申請禁制，不准他對外透露公司會議內容、拒注資數碼廣播並非違反協議等。
這次大班與黃楚標激鬥，主要分成兩派。一邊是大班、何國輝、夏佳理，佔股權近四成，屬小股東。而另一邊則是一群富豪大孖沙，由公司主席黃楚標領頭，李國章、李國寶、黃子欣聯手，合共佔五成股權，有權話事。
黃楚標向本刊承認，鄭經翰已提出半價出讓股份方案：「係佢提出嘅，我哋都唔想無咗個牌照，之前投資嗰一億五千萬就會無晒。我哋十月九號會開個股東會再商量，因為李國章、黃子欣都唔喺香港，唔係我一個人話事，但買嘅話唔會得我一個買，會一齊買。」
原來半價股份，並非真的好抵買：「大班係台長，何國輝係 CEO，買咗之後佢仲係公司員工，你唔要佢你要賠償五年管理合約的人工，如果賠償起上來係好高金額㗎，計起上嚟仲貴過買股權㗎，要幾千萬！你知鄭生點會咁平同人打工㗎！」


大班台本稱九月三十日是 last day，近千名市民到場支持及捐款，不少人對電台依依不捨，爭相與大班合照。（網上圖片）


八月底，大班在遮打花園舉辦《把聲留住燭光晚會》，不少泛民人士到場，包括（由左至右）莫乃光、鄭家富、李柱銘、毛孟靜、司馬文，一起聲援捍 衞言論自由。（李育明攝）


黃楚標不停派人到大班台查數，員工不勝其煩，更掛起簡體字橫額，諷刺黃楚標是內地政協。（《蘋果日報》圖片）

堅持查數

大班台或將易手，目前的 DJ及台前幕後員工都以半價出糧，假若最後由黃楚標購入電台，未知他們會否繼續留守？

黃又強調要繼續查數：「就算買，你買棵菜都要睇吓有無毒㗎嘛！唔係食咗咪死！間公司我哋無參與過㗎！究竟有無瞞住董事局喺出面借錢呢？同埋而家成日一百蚊俾人賣廣告，到時我哋接手點算，都要睇清楚！」早前堅持不注資、不加入新股東的黃，明顯對收購一事非常感興趣：「如果我哋公司運作正常、公司啲數又清楚，我哋不排除會商量嘅，仲傾緊嘅！」
但主動要求賣盤的大班，卻對外宣稱其實不想賣盤，只是不想員工無得撈：「我要考慮，我哋都有抗拒，公司兩個股東有爭拗，只可以提出你買我或者我買你，否則我破產㗎！我唔可以清盤㗎，佢可以告我㗎！呢個係唯一可行嘅商業考慮。」對於黃營擔心要賠償幾千萬管理合同的人工，大班又稱：「我哋唔係睇呢啲嘢，邊有得賠，賠條毛！嗰個賤人最後咪又係同我打官司！」他說將於週三採取法律行動，反告黃楚標誹謗。
但如此一來，廣播牌照豈非落入他聲言要力抗的中聯辦之手？「佢買咗就梗係變咗文匯大公，但係唔使擔心，唔會有人聽嘅！如果唔賣，我同佢都可以再申請過個牌，到時你話梁振英俾邊個？」又激動說：「我警告你，你唔好以為我為咗錢想離開，我告埋你㗎！」 

嚇走白武士

由說中聯辦打壓，到誤中副車；由主動提出賣盤，到說其實很抗拒，大班立場難以捉摸。有前員工爆料：「八月嗰陣大班係威係勢，話要買起黃楚標嘅股份。其實大班根本無錢，當時有幕後買家有興趣，肯泵水入股。點知個買家最後臨時縮沙，佢唯有變陣！」他又指，由於大班不斷對外指中聯辦打壓電台，令不少白武士怕得罪中央而卻步，最終無法引入新投資者。現在大班改口稱非中聯辦打壓，較容易出讓手上股份。
前員工又補充稱，不少大孖沙對數碼電台的未來發展有保留，要數現時最有興趣投資傳媒的，都是中資商人。他說：「黃楚標肯買，當然唔係為咗投資啦，一來買咗又可以同中聯辦交心，二來ＣＹ上任百日如果就爆單傳媒滅聲，都唔光彩啦！所以佢肯出嚟接波係好事。」現時亞洲電視、《新晚報》、《成報》等，都是中資泵水。
據了解，有深圳李嘉誠之稱的黃楚標，在內地有多個地產項目發展，固然希望與中央保持良好關係；但李國章及李國寶覺得無乜着數，對收購股份仍然考慮中。


電台股東黃子欣（左）及李國寶（右）將於十月九日開股東會，齊齊商討是否願意購入鄭經翰等人的四成股份。（《蘋果日報》圖片）


壹傳媒主席黎智英九月初踩入 DBC，與大班一同開咪，呼籲選民投票支持泛民，之後更借出《爽報》網上平台直播 DBC節目。（《蘋果日報》圖片）

另有新地盤

恰巧在九月初，壹傳媒老闆黎智英為了在立法會選舉中支持泛民，走到大班台開咪。不久，《爽報》為大班台提供網上平台，以視像轉播電台節目，甚至設立節目重溫的資料庫。大班又借機在節目中晒冷：「如果以壹傳媒 300萬人次瀏覽嚟計，我哋 DBC而家已經係全香港電台網頁，最多人聽嘅電台！」
「自從大班去咗《爽報》，網台個點擊率即刻高咗，以前電台個網頁做得好差，連網上重溫都無，而家節目重溫都有萬幾人聽！」大班人氣翻升，亦已經鋪定後路，即使退股數碼電台，他已在壹傳媒大樓建立一個廣播室，有機會在十月移師將軍澳開咪。大班對新動向保持神秘，他說：「我仲考慮緊㗎，嚟緊我要入醫院整吓隻腳，打完石膏都幾個月啦，未諗好㗎！」 

撰文：時事組