CLOSE-UP

新式教學

2012年10月04日 ~~ 第1178期 香港《壹周刊》

科技融入校園，搞電腦室、全校裝 Wi-Fi，動作多多，不過硬件是其次，點應用先最重要。講到尾，無非為吸引班學生學習。近期中大同港大將流動元素結合教學，學生上堂名正言順拎住手機或 tablet答問題，十足玩緊「匯應通」，連舉手都慳番，甚至全班齊齊 share美術功課，公投俾分。


開學僅兩個禮拜，李教授已用過幾次 uReply，仲話之後都會繼續用。

「用手機經 Wi-Fi或流動網絡輸入投影幕上面 嘅網址，然後入你個名。」在中大任教的生物醫學學院一級導師李潔瑩教授，正在電腦上設定選擇題，準備叫學生作答。不過同學毋須舉手，因李教授正以中大（ http://www.cuhk.edu.hk）上月初推出的 uReply教學系統發問，答問題用手機就得，答案會自動顯示在教師的電腦上，「以前上堂，個個十問九唔應，今個學期轉用新系統，學生覺得有新意，又唔使擔心如果答錯問題會好瘀，所以反應變得踴躍。」李教授話學生反應冷淡，連記者都 feel到，上堂前李教授三番四次叫同學靠前坐，無一個肯郁，難為李教授用 uReply之餘，上生物堂時為令學生體驗味覺，仲要買糖買零食派俾同學食，教大學生都要搞花臣，認真用心良苦。
「未必個個同學有流動上網裝置，所以會分組答問題，令所有人都可以參與。」不擔心學生用手機實情是玩緊 WhatsApp（ http://www.whatsapp.com）、 Facebook（ http://www.facebook.com）？李教授無奈話只可以靠學生自律，「就算無 uReply，佢要上堂玩手機都冇計。」 

掌握進度

講到 uReply，李教授讚不絕口，「好易用，學生毋須搞複雜設定，手機、 tablet，甚至 notebook，開到 browser就用得。」而且多了學生參與，更易掌握學習進度，「如果好多人答錯，即係好多同學未明，就要重頭再講。」


教師可決定是否顯示學生所揀答案，而右方就睇到參與人數。


uReply有 iOS專用 app，可直接輸入資料， Android及其他裝置就須用瀏覽器登入。

原理解說

uReply系統的運作原理，是教師只須在連接到系統伺服器的電腦上輸入課堂編號，製作一個網址，這個網址代表一個虛擬班房，學生就於手機或上網裝置登入網址，從而睇到教師的問題並作答，答案會即時傳到教師的電腦，再投影上課室的投影幕，全班幾多人識答，一睇就知。
系統概念來自外國專上學院早已採用的 clicker手提投票系統，中大學能提升研究中心副教授藍澧銓說三年前已著手研究 clicker，「傳統 clicker得幾個掣，只可以做選擇題，所以研究並改良成手機版，可以輸入文字答案，夠彈性。」藍教授指問題及答案都會儲存在伺服器，就算學生上堂時遊魂，都可隨時翻睇。


劉同學（食品及營養科學系二年級）
好用又好玩，過程又簡單，毋須設定一大輪先用到。


貝同學（生物化學系二年級）
同老師多了互動，好過以前齋坐，悶到幾乎瞓着。

大學最愛

Clicker得幾個掣，只可回答簡單問題。

專供課堂上使用的 clicker手提投票系統，早在九十年代中出現，研究指出可令怕醜學生踴躍投入答問題，據統計有近二百萬大學生使用，當中更包括英國哈佛、美國加州大學等。不過傳統 clicker操作麻煩，使用時須派發及收回，加重教師工作量及浪費時間，所以用手機或 tablet變身做 clicker，效率大增。 

立體教法

不單大學積極搞「科研」，教科書出版商亦利用 Augmented Reality（ http://en.wikipedia.org/wiki/Augmented_reality）（增強實景）技術，將悶爆教材變得生動，例如打開數學書，望住四角錐體、三角柱體……仲要諗埋有幾多個切割面、支撐點，聽見都悶，但將相關 AR卡對住電腦 webcam，電腦屏幕就會顯示各種立體圖形， 㩒個掣，仲可以顯示支撐點、切割面等，更易入腦。大眾電子教學高級經理黃一樂表示，採用美國 Total Immersion（ http://www.t-immersion.com）研發的 AR技術，「 AR卡製造方便，甚至影印完系統都可以認到，仲可以應用到其他科目，例如科學，顯示火、水等較難在課室展示的物品。」現時只造好數學科教材，並派發到數間小學做試點，仲未有正式推出日期。


將 AR卡對住 webcam，屏幕就會顯示立體圖形，學生更易明白。


可以在 AR卡上加入「虛擬按鈕」，隨時轉睇紙樣、橫切面，毋須教師整一大堆立體教材。

雲端課室

學生的「大作」即時傳上伺服器，並自動推送至教師的電腦。

用科技教書，好處是毋須坐定定，沙田保良局朱正賢小學搞流動課室，學校四圍貼滿 QR code（ http://en.wikipedia.org/wiki/QR_code），學生用 iPad掃描 QR code，就睇到下一個行動或問題；玩完遊蹤，又可以用 iPad（ http://www.apple.com/hk/ipad）上數碼美術堂，學生畫完畫，其他同學就即時睇到，甚至互相評分。「以前美術堂，要派畫紙又要整顏料，之後要去洗乾淨畫筆；收齊學生作品後仲要逐張俾分，好冇效率。」不過負責學校資訊科技的李志成老師話，目前學校只有約四十部 iPad，每次只夠一班用，要等到年底政府撥款，先可以再買更多 iPad。 

其實學校所用的是港大去年底推出的 iClass系統，資料以雲端儲存，集畫畫、文字、電子書及 QR code功能，負責開發 iClass的港大工程學院助理院長霍偉棟教授表示， iClass強調即時互動，「學生寫文字、畫畫，都會即時經雲端傳送到教師嘅電腦或 iPad上，教師可以馬上評分，學生之間亦可互寫評語， iPad操作直接，用手指就得，比 notebook更適合畫畫。」霍教授指電子教學推行多年，以往學校雖然同樣將教材儲存在伺服器上，供學生登入下載檔案及交功課，但只可說是一個平台，缺乏即時互動功能，「 iClass為教學應用而設，特別注重評分及即時互動功能，而且介面簡單，學生一睇就識用。」


iClass不單可以用來寫字及畫畫，更加入 QR code及電子書等功能。


全班學生的作品都可以互傳，進行集體評分或寫評語。

體感玩樂

微軟新推出的體感遊戲亦主張 playful learning，用 Kinect（ http://www.xbox.com/zh-HK/Kinect）配合 National Geographic（ http://www.nationalgeographic.com）推出的《 Kinect Nat Geo TV》，於熊、貓頭鷹、狼及山羊四種動物生活影片中加插體感遊戲，例如學熊在河邊捉魚，藉此認識動物的生活習慣，好過齋睇片。
對於年紀較細的小朋友，未必有興趣望住熊、狼，亦可試用《芝麻街》（ http://www.sesamestreet.org）一眾角色，吸引小朋友目光，《 Kinect Sesame Street TV》將上年九月播放的第四十二季內容，轉變成三十幾個小遊戲，例如利用體感數數目、學習英文字母等，郁埋手腳學習，小朋友更鍾意玩。 

facebook群組創立

NEXT 3.0除了繼續搜羅最新產品同潮流玩意，更特別開設 Facebook群組，提供互聯網世界精彩新聞同產品情報。只要在 Facebook以「 NEXT 3.0」為關鍵詞搜尋，或以手機的「 QR code」 app掃描就搵到，而且全日更新，想睇更多新資訊，就要即刻加入。 

text：劉耀祥
photo：許朝暉、吳卓凡、吳超德