沙膽彤娶孫新抱， CY化作新翁純官嘅幕後男人。

中環人語

三代特首賀彤叔

2012年10月04日 ~~ 第1178期 香港《壹周刊》

沙膽彤住養和，孫仔鄭志明百無禁忌，照原定計劃喺君悅設宴迎娶美詩•張美施。斯日也，特區政商猛人盡出不在話下，而最是觸目嘅嘉賓當推董、曾、梁三代特首矣。從呢張相可見， CY更成為咗純官背後嘅男人添！
當日新老爺循例上台講嘢，純官話上次嫁女飲大咗，講足四十分鐘，悶親賓客，今次吸取教訓，只講咗三分鐘就收嗲！新郎哥嘅大佬鄭志剛，上台大展歌喉唱英文歌娛賓，幾乎仲興奮過自己娶老婆。

「名媛」探病食閉門羮

「名媛」洪子晴養和探彤叔不遂，而班娛記又認佢唔出，慘！

彤叔中風入咗養和 ICU，謝絕外人探訪。曾經陪鄭裕彤、明嘉福等同遊日本、俾大劉鬧佢係「名媛」之洪子晴就唔理咁多，照探可也。
上星期三佢一身紅噹蕩咁揸住個果籃去養和，不過始終親疏有別，「名媛」連人帶果籃被摒諸門外。瘀成咁，於是急急叫助手靜雞雞拎個果籃上車：「唔好放個果籃喺車尾，如果唔係會俾記者影到㗎。」
探病不成，佢都等咗十五分鐘至行出嚟，認真識得整色整水也。佢個司機就慘啲，要喺養和門口兜咗成十分鐘圈。可惜吖，班娛記根本唔認得佢。 

史上最強黃金週大軍

史上最長之黃金週搞到澳門佛笑樓應接不暇。（《飲食男女》圖片）

今年十一黃金週，長達八日史無前例；內地小資人人揸車外遊，固然搞到全國交通癱瘓，小小澳門同樣應接不暇。
呢，好似濠江冧巴溫食肆佛笑樓咁，本來已經交由第四代打骰，點知黃金週大軍殺到，卒之退居廚後之第三代掌門人黃如榮亦要出鋪頭重揸鑊鏟。只不過炸咗一日乳鴿啫，佢已不得不大嘆老夫老矣，要返歸抖抖，留番俾班後生搏殺，錢係搵唔晒嘅，老細。 

金牙大狀講嘢
票后奴隸歪論

票后（過氣）陳婉嫻指控僱主搞奴隸主義，事浮於人，你估話剝削就剝削到㗎？（《蘋果日報》圖片）

工聯會票后（過氣）陳婉嫻指控唔想上調最低工資「係反智，顛倒是非，幾十萬勞工無議價能力，等同做奴隸」，而唔保障工人嘅僱主乃在搞「奴隸主義」。語言暴力，莫此為甚，唔通做議員就有特權亂吠？共產黨煽情口號老早冇市場啦，票后！
官家最新之統計數字顯示，八月之失業率為 3.2%；水平之低，靚絕全球，更顯然係勞工短缺之象。但凡出街食過嘢，大家都知道冇一間食肆唔係人手不足者。
官家統計又顯示，相對於一年前，全港各行各業之職位空缺激增四分一至近七萬一千個。勞工市場供不應求，一年嚟平均工資上漲 5.1%，幅度高過通脹。請問陳票后（過氣）啲僱主安有良策搞「奴隸主義」呢？事浮於人，你估話剝削工人就剝削到㗎？
啲議員恃住攞到幾張選票就以為真理在我，吠得就吠，亦得擘大雙眼睇清楚世界現實乎？納稅人每個月俾十萬銀人工過你，係叫你擺事實講道理，唔係聲大夾惡，以語言暴力分化社會， OK？ 

小王子大贏家

喜歡人稱呼佢做「工廈小王子」嘅楊國佳，近排十分風騷，皆因中海油（ 883）孖佢有同好，大家都睇中加拿大能源公司 Nexen，咁佢有乜辦法唔發呢？
月前佢由加拿大返港小休，醒咗一大疊關於中海油收購 Nexen嘅加拿大剪報同投行研究報告俾我哋做「手信」，喺份有關 Nexen嘅研究報告上，佢親筆寫上「 means undervalue」。證明小王子好有眼光。
中海油收購消息一出， Nexen股價狂颷六成。小王子家吓仲揸重貨，你話佢心情靚唔靚啦？斯日也，佢喺四季酒店龍景軒食完晏，施施然踱過去 IFC，喺花鋪買咗一大束粉紅玫瑰同劍蘭返寫字樓，話希望繼續催旺啲好運咁話喎。


楊國佳吼中 Nexen，一早睇出間公司超值；中海油咁啱孖佢有同好，咁佢有乜辦法唔發呢？

強國同志搞雜誌

傳媒愈來愈難做，強國同志偏向虎山行，要喺香港搞雜誌。邊個咁夠膽？網上時事雜誌《陽光時務》金主、同中共改革派關係友好之陳平也。今個月下旬，佢本雜誌會由雙週刊變成週刊，電子版之外加推紙版，每本賣三十蚊，比電子版十五蚊貴一倍。非但貴過敝刊，更要走深度嚴肅加文藝路線；若然俾佢哋殺出條血路，則肯定係奇跡——甚至係神跡。
呢本週刊將由大陸報業猛人程益中主政，佢話雖然潮人興睇電子書，但全世界冇本有影響力嘅雜誌係唔出紙版者。佢寄志如何，仲使講到明乎？
程益中係《南方都市報》創辦人，○三年率先揭開沙士黑幕而聲名大噪，同年又喺北京辦《新京報》，足見魄力過人。後來佢被官家老屈「經濟犯罪」，坐咗十個月監。重獲自由後佢輾轉嚟到香港，再戰江湖。大家且等住睇佢如何創造奇跡啦。




程益中深信雜誌有得做，一於祝佢創出神跡。

平民化校長

沈校長想學國家領導人咁頭髮烏卒卒，但剪髮則平民化。

中文大學有間 Comer Hair Salon，上個禮拜三，沈祖堯校長紆尊降貴走嚟幫襯，仲同髮型師 Bowie真情對話：「係咪有啲可以逐漸變黑嘅染髮劑㗎呢？」吓？想玩漸變？搵曾江啦。
校長此言一出，搞到 Bowie都唔知點反應。校長笑曰：「係呀，好似中國領導人咁，啲頭髮幾時都咁黑。」
Bowie食住上：「咁你都係領導人吖！」校長應曰：「我唔係，我只係平民百姓啫。」呢間髮型屋，洗剪吹盛惠五十六蚊，平，靚，正。中大最高領導人都幫襯，顯見沈校長親民，唔似得啲頭髮烏卒卒嘅強國領導人咁，所到之處，方圓十里都要清場。 

中環人語迷你版

我現在要趕回辦公室跟廣東省聯繫。

估中邊個中環人講呢句說話，送你 JWATCH J-33藍寶石鏡面限定版手錶一隻
有意參加者，請於十月八日 24:00前將答案電郵 mailto:centralman@nextmedia.com
小宗只接受電郵，郵寄免問。 

上週人語揭曉

（《蘋果日報》圖片）

答案
不是多人舉英國旗，很少人，很少人。

陳佐洱
得獎者： S.C.Wong
中獎時間： 1:00pm 26/9/12

本刊員工及直系親屬不得參加。
為求公平及杜絕偷步搶答起見，請於星期三下午一時後
來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一二年十月十一日本欄揭曉。