好味到暈！（設計對白）
大隊開始收工，食到唔夠喉嘅華仔，竟然返轉頭繼續食番夠本先肯走。
媽咪姐
牛華狂隊牛雜
華仔被形容為「勤力牛」真係一啲冇錯。早幾日先見佢喺中環拍攝新戲《風暴》，哈，轉過頭又見佢為杜琪峯嘅《盲探》開工喎。話時話《盲探》係影壇鐵三角劉德華、鄭秀文同杜琪峯八年後再次合作嘅新片，所以電影公司特別重視。
媽咪姐前兩日就喺灣仔見到劉華同 Sammi開早班。現場所見，除咗佢兩個，仲有高圓圓客串㖭。當日拍攝華仔同 Sammi去街邊車仔檔買嘢食嘅場口，見華仔係咁拮牛雜食，仲食得津津有味。反而 Sammi就冇佢咁輕鬆，事關要喪跑。到大隊收工，華仔可能食得唔夠喉，竟然返轉頭隊多幾串牛雜先收口。可憐嘅大明星！
偷食
華仔同杜 Sir（左二）傾戲時，已經頂唔住牛雜香味，偷偷試食。側邊嘅 Sammi忍唔住笑佢。
狼吞
正式開拍，華仔更加打正旗號狂。
同場加映
唔知有心定無意，呢個檔仔叫做其記。杜 Sir秘撈？
Sammi拍完食嘢跟住拍喪跑，杜 Sir竟然一 take收貨。輕輕鬆鬆又收工咯！
大家隊牛雜隊得興高采烈，客串嘅國內名旦高圓圓就坐埋一邊隊餅乾。文化差異？
全站熱搜
留言列表
