揞名爆
「好跳得」食兩家茶禮勁無品
啲手機商每有新型號推出，都會送機俾明星名人，等佢哋攞住喺手，做吓宣傳嘛。不過，媽咪姐有次同班公關傾開，佢哋都話唔多想送機俾「好跳得」，事關佢個 record真係唔多掂囉！
話說有次某知名手機商有新機出，循例都會喺公開發售第一日俾新機啲明星名人。但「好跳得」嘅經理人就特登打去同人哋個公關講，話「好跳得」第二日要飛喇，好忙好趕住要部新機用，死都要人早一日俾部機佢。咁「好跳得」話晒係大明星，形象靚仔健康，公關雖然覺得難做，但最終都惟有就範啦！
好嘞，經理人死催爛催，但一攞到部新機，就無晒聲氣喇喎，又無話「好跳得」幾時會用。第二日，真相大白啦！「好跳得」原來做咗另一手機品牌嘅代言人，揸住人哋部新手機笑得幾咁陽光燦爛呀。嘩！公關喺電視見到呢個場面，即刻面都青埋，而佢老細就梗係面都黑晒，仲講到明以後 blacklist「好跳得」！查實一部手機對「好跳得」嚟講，算係乜嘢錢呢？咁樣明跣人、收兩家茶禮，然後俾人唱通街，又有乜謂呢？一個字，貪囉！ 
全站熱搜
留言列表
