《寒戰》結尾，梁家輝親手拉 咗親生仔彭于晏，好似大義滅親好正直，不過就有好多人估佢係終極大 boss，第時有機會拍續集時實會現形。
FBI
《寒戰》城城本來係奸
上畫十日， 喺中港台等地票房收過 2.5億， FBI都覺得老懷安慰，講緊套港產片《寒戰》喎！係唔係威先？
話時話，《寒戰》好睇，咪就係導演將個個角色拍到好似鄭子誠咁陰陰濕濕，似忠還奸有陰謀咁款囉，搞到個個睇完戲都有一套睇法，都要估吓到底邊個至係幕後大 boss。成套戲咁多男角，唯一冇爭議係天王城，由頭忠到落尾，絕無蠱惑位。不過 FBI收到風，套戲多可疑位，係導演特登拍 嚟為續集留嘅伏線，劇本本來就一視同仁，郭天王結局時都有一個陰濕奸笑樣，不過有人覺得做衰人影響形象，係都要叫導演取消呢一幕。總之郭天王就一滴都唔可以奸啦。
林家棟（左二）雖然被黑警安志杰殺人滅口，不過一樣好多人話佢係兩頭蛇，又係奸。
城城頭馬錢嘉樂貌似忠心，死後俾人發現有錢填巨債，一樣有二五嫌疑。
笑陰陰
至於城城，由頭正直到落尾，冇人懷疑過佢有陰謀。上星期佢出席《寒戰》祝捷會，就唔覺意陰陰濕濕笑咗，呢張相唔使 FBI刪除喇啩？ 
全站熱搜
留言列表
