今日好玩嘢

柔體風箏　冇骨氣飛得起

2012年11月28日 ~~ 第288期 Face

天氣轉涼、清風送爽，偶爾碰上北風都會諗起佢嘅好友「風箏」，然後哼番句「當風箏遇上風」，但唱就唱得多，諗起嚟其實都好幾年冇放過風箏。細個學校旅行放細風箏就心滿意足，人大咗貪心咗想要新意，可以試吓有兩、三米大嘅巨型無骨風箏，摸落軟腍腍，起飛後脹卜卜，唔只搶眼，二人合放更講默契夠浪漫。唔使怕風箏沒有風。今次搵嚟網上開店嘅風箏兄弟 Haiven同 Jimmy教大家如何乘風放箏。

互動片段

試飛無骨風箏

無骨軟體風箏

無骨架支撐，方便收納亦更巨型，展開後可長達兩三米。內藏氣袋，令氣袋入風後一樣可以起飛，放飛方法同有骨無大分別，但起飛途中如果吹至變形，風袋不能順利打開的話就會下墜。

有骨無骨風箏點樣分

Haiven話 𠵱家風箏主要分為三類：有骨、無骨同特技風箏，傳統風箏由骨架支撐成板狀食風飛行，而佢自己就最愛無骨風箏（又稱軟體風箏），貪佢夠大隻，又內藏氣袋，唔只靠佢入風起飛，飛上天後氣袋谷到脹卜卜，造型得意又有立體感。


軟體章魚
最受歡迎嘅章魚款，算易飛嘅一款，伸展後連埋章魚腳足有 6米長。售價：$168


章魚仔風袋喺頭頂，所以入氣後章魚頭會撐起唔會揦埋一嚿，風袋設計同風箏外形相關，變化比傳統有骨風箏大。


心更軟
心心形狀風箏，整個都係風袋，一升起就脹卜卜，但要較大風先吹得起。售價：$298

有骨風箏

呢隻七彩風箏叫做加州，有 3× 1.5m大，唔玩時要拆骨收藏，幾複雜。
售價：$298

傳統風箏有金屬或者竹製支架撐起，主要成板狀。大型有骨風箏唔係冇，但冇咁方便之餘，風箏食唔到風的話下降速度會較大型軟體風箏為快，放飛難度略高。 

雙線特技風箏

雙線特技風箏玩法同普通風箏唔同，手持兩個線圈控制（右圖紅圈），風吹起之後就靠郁動雙手玩花式動作，似玩遙控飛機。美國嗰邊有比賽，但香港只有少量愛好者，不算普及。
特技風箏外形同傳統風箏相似，主要係操作方法不同，操作時好似兩隻手拎住魚竿咁 fing嚟 fing去。
售價：$380

風箏兄弟 Never Fly Alone

Haiven同 Jimmy兩兄弟其實都係大個先迷上風箏，愈玩愈迷，大概兩年前開始留意到，內地有好多香港少見嘅大型風箏及設備，所以決定引入嚟，業餘性質網上開 shop賣風箏。佢哋都話香港賣風箏全職冇得諗，賺到嘅錢都係用嚟入新貨再玩，學佢哋口號「 You will never fly alone.」話齋，都係想多啲人玩啫。 

飛凡創藝 Falcon Art

查詢： 6113 2567/ 6113 2679
網址： http://www.kitehk.com/

無骨升空 Step by Step

Jimmy話風箏有骨、無骨放法雷同，拋鳶、收線扯起、遇風再慢慢放線，但係無骨風箏多數較巨型，兩個人放比較容易，另外亦要用上大型轉輪上線，普通線轆唔夠快扯起大風箏。攝影當日，適逢有學校到大坳門旅行，班學生見佢兩兄弟夾手夾腳將巨型火龍同章魚放天上，都一齊指手劃腳議論紛紛，真係好有滿足感，霸氣十足。 




1.第一步先上線，呢件嘢叫風箏放發器，其實原理同線轆一樣，但有手柄握住，攪輪速度快好多。（圖為 25cm大型版，連 700m線/$138） 




2.有骨風箏係將線綁於骨架上嘅金屬圈，軟體風箏就用線綁線，風箏面有一大堆線，末端成結，風箏線就套在結嘅上方。 




3.Haiven好熟練咁將風箏線綑成繩索結，佢話咁樣套得緊亦方便除下，但唔熟繩結者亦可打死結，總之綁得實就 ok。 




4.上好線後，兩個玩家一個拎風箏放發器、一個就拎風箏，開始時要企遠啲，距離愈遠，條線放得愈長，收起線嚟愈易扯得起隻鳶。 




5.等待有陣風吹過，就可打手勢畀拍檔將風箏鬆開，另一邊見風箏就可以將手把向前攪收線，稍稍向後退亦可幫助風箏起飛，但無需奔跑，危險又幫助不大。
6.風箏食到風就自然會扯線出嚟，永遠唔好叻唔切自己主動放線，反而要因應風力，控制住佢慢慢放，覺得風箏去勢太猛，不太穩定時要 hold一 hold先繼續放，感覺到風箏有下降之勢就要收線。 

放風心得:

Haiven話風箏線粗幼其實係用來配合風箏面積同風勢，不代表愈粗愈好。對新手而言，用起來分別更是不大，唔需要太講究。

Haiven話放風箏冇乜技術，主要都係睇風放箏，佢話高空幾時都有風，至於幾高先有風，可以靠睇樹判斷，見到樹頂啲葉搖晃緊就表示嗰度係有風區（ flying zone），將風箏放到呢個高度就會穩定受風，去郊遊見到風吹葉動正表示適合放風箏喇！以下仲有幾點心得：
1.放風箏正確位置應該係背風，感覺到風由背部吹過來先放得起。
2.放飛時兩人距離有咁遠得咁遠，快速攪動線輪時讓風箏有較長時間爬升。
3.不要快速放線，刻意將線釋出的話線會打結。
4.帶備萬用刀或剪刀，打結、勾住其他風箏線或降落樹上都可割斷風箏線，但記得清理。 

放風箏好去處

放風箏要揀空曠同地勢較高嘅地方，風箏兄弟話香港其實都唔太多好去處，以大美督、大坳門、塔門、大埔公園為主，假日例必人多，早去有着數。

大坳門

亦即清水灣郊野公園，有政府認可的風箏場，風箏場處於高地上，風勢強勁，是一個非常好的放風箏熱點。

前往方法:
可由鑽石山港鐵站乘搭 91號巴士至清水灣大坳門道迴旋處下車，步行 20分鐘前往、亦可由坑口港鐵站乘的士直接前往。 

塔門

塔門亦算是一個放飛熱點，雖然是離島，路途較遠，但風景美麗，不失為一個郊遊放飛的好去處，山頂上就是放飛及露營熱點，露營放風箏兩料郊遊都幾寫意。

前往方法:
於西貢市中心乘 94號巴士到黃石碼頭，然後乘渡輪往塔門。 

撰文：司徒港燊
攝影：葉偉豪
模特兒： Cherry@Unique Model