無綫上周收視。星期一《萬千星輝賀台慶》平均收視34點；《愛·回家》平均收視25點；《名媛望族》平均收視28點；《大太監》平均收視31點；《瘋狂歷史補習社》平均收視25點，升1點。
亞視收視大突破﹕四個零﹗
2012-11-26 16:28:14
禮拜一又要返工，一眾亞視「fans」最期待，莫過於等睇收視表。
上個禮拜亞視創出平日黃金時段新底嘅「三零」部隊(《微播天下》、《國際財經視野》同《把酒當歌》)，大家已經暗地裡開定盤口，預測亞視會唔會「零的突破」。
結果終於揭盅啦，上個禮拜亞視嘅收視又有大大大大突破，答案係四個零呀！分別係《微播天下》、《國際財經視野》、《周四微‧電影特號》同埋《把酒當歌》。「三零部隊」成功冧莊繼續零收視。厲害厲害。
話時話，之前《微播天下》賣行晒廣告整個「維基解碼」，以解剖外星人手法唱前僱員王維基，結果收視零點，即係冇人理到完場，真係陰公豬。
亞視台慶 收視有一點
2012-11-26 16:31:45
亞視收視四零，咁千呼萬喚嘅2012年亞視55周年第N次台慶又有幾多點收視？原來都有1點，即係64,070人次收看。咁亞視四小龍：江華、陳庭威、林韋辰同潘志文都安落啲。其實亞視為咗爭取呢「1點」，事前有舖排0架，就係破天荒、冇安排呢個台慶騷即晚重播；當晚重播嘅，係亞洲先生。遲啲先有得重溫喇。
《決戰1分鐘》首播 越鬧收視越高
2012-11-26 17:18:27
無綫今日公佈上星期嘅收視成績，重金禮聘李克勤返嚟主持遊戲節目《決戰一分鐘》，第一個禮拜嘅收視成績有30點(約192萬人次收看)，唔單止成為全年遊戲節目收視之冠，仲係喺過去3年嘅周日同時段、首播嘅遊戲節目收視最高，但係都接到5個電話，投訴宣傳片內容表達唔尊重父母。唔少網民大彈遊戲太小兒科。咁如果第一集已經好難玩嘅，觀眾咪一樣鬧爆。
至於噚日亞視同時段就選擇播《ATV 2012亞洲小姐大中華環球分區賽》，都有1點收視。即係約6萬人次。綜觀成個禮拜，亞視收視最高嘅節目，係《六點鐘新聞》，有5點收視。
另外無綫亦收到51個電郵，投訴話點解鍾嘉欣冇份提名「我最喜愛電視女角色」呢個獎。
留言列表
