新車激試

德國慕尼黑測試　中段發力 Audi Q5 facelift

2012年11月28日 ~~ 第1088期交易通．搵車快線

歐洲車廠玩 SUV玩到出神入化，稍有實力嘅車廠都梗有一、兩款看門口， Audi近 10年大紅， SUV車種極之齊備，大有 Q7、小有 Q3，而負責中級市場嘅，就係今次要去到德國慕尼黑試車嘅主角 Q5。 Q5推出已 3年，未到大轉款期，但新鮮感已明顯冷卻，係時候嚟個中段大爆發！除作出外表上細微細眼改動及引擎改良外，仲同時向高性能及環保方向發展，推出 SQ5及 Q5 hybrid。

多部 Q5一字排開，部部都有唔同配備，外觀上一下子較難分出型號。

一般嚟講，車廠推出全新車款都會大搞一番，今次 Q5只算係 facelift，以及順勢推出 SQ5及 Q5 hybrid，所以試車地點設於德國慕尼黑機場、 Audi試車中心一帶路段，旨在讓一眾傳媒快快試過新車，而且可在短短兩、三小時內完成試車，快、靚、正！不過比較可惜係，廠方原意係以 SQ5為主角， facelift Q5及 Q5 hybrid係配角，但由於代理表示暫只有 facelift Q5肯定會年底到港，而 SQ5及 Q5 hybrid來港機會較微，所以主力測試仍落喺 facelift版上。

難分不同版本

大清早去慕尼黑機場 Audi新車中心試車，正式係眼都未睜開、神智都未清，就要面對一大堆新款 Q5，當中夾雜 facelift 2.0版、 3.0版、 SQ5及 hybrid版，由於全部都用上新款 LED頭燈及尾燈組合，基本上同出一轍，再加上歐洲車慣例，唔理你咩型號都可以加 option惡辣包圍，就算筆者自問認車叻，一時三刻都分唔到！同行代理職員表示，本港暫先引入 2.0T及 3.0T版，筆者發覺呢兩個型號外表好相似，基本上唔睇車章分唔到。而 SQ5就因為用 4出式尾喉而較易認，但 Q5一直係改裝界 hit hot車款，要改唔難。新 Q5外表對比舊款毋疑係醒神咗好多，但原來似乎冇改動嘅頭冚同車頭內隔位置已靜靜起革命，改為鋁合金物料製造，可令車頭減輕 5kg負擔，對操控同耗油都大有益處。

Before
Facelift版改用包圍成盞頭燈嘅新款 LED日光燈，鬼面罩亦起晒角同加入更多電鍍部分。

After

多路同級對手夾擊

Q5身處嘅中型 SUV市場一直都係車廠必爭之地， Q3雖然唔係新仔，但要喺同級中突圍都唔易，同鄉德國有 BMW X3，英國有 Land Rover Range Rover Evoque，連北歐瑞典都有 Volvo XC60。

最強對手 BMW X3

要數 Q5最大競敵一定係 BMW X3，全因 X3雖然只有 xDrive28i同 xDrive35i兩個型號，但輸出 258匹、 306匹，正正比兩個來港 Q5型號都強，車價只係$561,600-$683,000，加上 BMW操控功夫好，只有佢會阻住 Q5發達。

外表型爆 Land Rover Range Rover Evoque

SUV帶有少少越野性能， Land Rover又點會唔爭食？ Range Rover Evoque舊年推出即爆紅，全因外表型到震，設備豪到爆，雖然只得一副 240匹 2.0公升引擎，但備有四門同雙門版，都係一大賣點，車價就由$668,000起。

勝在夠平 Volvo XC60

Volvo車質素唔差，但個名未到一線，所以成日出現抵玩車，好似 XC60車系，最新 T5型號採用同 Range Rover Evoque一樣引擎，但車價只係$499,000起，平咗成十幾萬，而且個款一啲都唔老餅。

首玩 hybrid

今次海外試車另一個亮點係同場出現 Q5 hybrid，係車系首次增設 hybrid型號， Q5 hybird基本上係一部加咗電動系統嘅 2.0汽油版 Q5，因為直接採用 211匹 2.0 TFSI引擎，而加埋電動系統之後，綜合馬力有 245匹，耗油量 7L/100km。如喺充足電量之下， Q5 hybrid可以 60km/h電動行駛 3km路程，好適合香港地塞車用。但由於只得一部，再加上本港市場唔會引入，所以傳媒未有試車，但 Q5 hybird卻係一部值得期待嘅車。

After
新款軚盤改為圓形中心及下幅開窿款，比舊款更 sporty。

Before

摩打設於波箱前

Q5 hybrid成個系統同日本 hybird車有啲唔同，摩打放置喺波箱同引擎之間，可以更加直接切換兩者動力，減少動力流失，如果喺充電層面睇，更有利回收動能轉化為電力。

車尾放薄鋰電

Audi hybrid科技同 VW同出一轍， Q5 hybrid都好似 Touareg咁，喺車尾放置薄又細鋰電池，有強大電量之餘，最重要係唔影響車廂空間，唔會好似舊世代 hybrid車咁，慳油但唔夠實用。

加豪又加舒適

不論咩版本 Q5，車廂舒適性都係一致，只要你花得起錢，基本上可以加入好多唔同享受嘅設備，好似天幕車頂、製冷製暖座位、以及各式各樣多媒體系統。不過新 Q5都有唔少較新穎設備畀車主揀，好似可控制溫度嘅杯架、車身盲點車輛警告，同埋新增啞色夾層木料裝飾，令到新 Q5車廂豪華味同舒適性都雙雙提高。 Q5作為一部中型 SUV，唔多唔少都預咗買家用嚟戶外活動一番，尤其慕尼黑當地都有唔少人踩單車，所以 Q5尾廂可以與摺平後座貫通，將原有 540L尾箱，一下子成為 1,560L空間，載單車等長物件極之有用，而所有 Q5都預設咗金屬頂架、行李隔網等設備，令可用性大大增加。

手枕前杯架有保溫功效，以後飲熱咖啡都可以暖住慢慢歎，塞車良伴。

新增啞色木料裝飾極之靚仔，除淺木色外亦有深啡色。

尾廂有唔錯空間，兩邊有金屬軌方便放行李網或隔板。

後座 3張座椅都有獨立頭枕，仲可以個別翻摺。

大馬力竟慳油

雖然話 2.0同 3.0版本都會到港，但試車時間有限，筆者主力測試全新引擎嘅 3.0版本。 2.0版本由以往 211匹馬力提升到 225匹， 0-100km/h加速數據快咗 0.1秒， 7.1秒搞掂，而加入咗停車熄匙系統後，耗油只需 7.9L/100km，廢排亦已通過即將推出嘅歐盟 6標準。
新款 272匹 3.0版本配 supercharger，取代之前 3.2公升自然吸氣引擎，馬力雖然只增加 1匹，但扭力就大幅增加 7.2kgm，達 40.8kgm！而且最重要係 2,150rpm已發出最大扭力，令 3.0版本加速快到 5.9秒完成 0-100km/h！而耗油都只係 8.5L/100km，整體比舊 3.2版改善達 15%。駕駛新 3.0版本喺慕尼黑近郊一帶試車，就可以發覺引擎發力點極之廣闊，好似任何轉數一踩油， 8速波箱都會毫不猶豫作出反應， kickdown敏捷而順暢，相信係同改用 supercharge引擎有極大關係。

3.0版 272匹 supercharge引擎行高速強悍，亦有落山車速控制系統，保留一定 off road實力！

一貫 Audi式清晰表板， facelift後都冇必要更改。

新 supercharge引擎集大馬力、大扭力、低耗油等多項優點。

軚環背設有金屬轉波撥片，使用方便之餘亦有款。

8速自動波箱表現極其順滑流暢，同新引擎非常 match。

Audi Q5 3.0 TFSI Spec.

引擎： 2,995c.c.V6 supercharge
馬力： 272hp/2,150-4,780rpm
扭力： 40.8kgm/2,150-4,780rpm
傳動： 8前速自動、附+/-模式
懸掛：前五連桿、後多連桿
車身： 4,629× 1,890× 1,627mm
車價：未定
查詢：合迪汽車（ 2528 1862）

SQ5首玩柴油勁偈

雖然話 SQ5唔到香港啫，但話晒都第一次進身「 S」級別，而且更特別係首次「 S」級車配用柴油引擎，完全打破好多人心目中柴油引擎只為慳油觀念，原來柴油都好爆！ SQ5採用 2,967c.c. V6雙 turbo柴油引擎，馬力達 313匹，扭力更達 66.3kgm！全數喺 1,450-2,800rpm輸出， 5.1秒就完成 0-100km/h，係有史以嚟最快嘅 Q5！唔單只引擎改咗，連全車懸掛系統都 S Sport調校，比正常低 30mm，令車身傾側更少。
筆者試車時最深刻一定係 SQ5嘅加速力，其次一定係全車都大量滲入洗腦式包裝，周圍都有 S系列專用徽章，連座位都係專用半桶形設計，比 3.0汽油版更高級，相信愛追頂級嘅香港市場一定 buy，但受制於香港低能嘅柴油私家車入口條例， SQ5想喺香港以私家車身份出牌都幾難。

SQ5有泵把射燈之餘，鬼面罩上都有 SQ5章。

望見 4出式尾喉就知係 SQ5！

專用平底賽車軚盤，一望就知身份特殊。

SQ5引擎最爆其實唔係 313匹馬力，而係達 66.3kgm嘅低轉扭力！

半桶形座椅上都刻咗 SQ5字樣。

柴油引擎發力點低，所以 SQ5表板顯示 4,500rpm已經係紅區。