娛圈驚爆「迷幻飯局」，仲要揀正喺葉佩雯結婚嗰日傳出，搞到一眾藝人，包括一對新人、何超儀、陳奕迅等等都被問回應。陳奕迅已經全日封嘴兼黑面，徐濠縈更加係連好姊妹婚禮都做缺席。只係喺instagram轉貼黃浩(事發食肆老闆、徐淑敏老公)張相，狂鬧爆對方「博見報」、「人渣中之敗類」。
究竟當日有份去呢間食肆開餐嘅有邊幾個，到依家仍然係一個謎。今日就有報道話，掃毒組及情報科已介入調查，而事發日期，係去年10月15日，總共有23人。
報道話，當日眾人去呢間食肆，係幫朋友慶祝生日。當日眾人將兩間VIP房打通，開咗兩圍枱，食雞鍋、打邊爐，劈酒。有指唔知係咪有人飲大咗，喺度大嗌，伙記入去睇，就見有啲人周圍行，好似飲大咗咁，有一堆嘢擺咗喺前面，當中有藥丸狀嘅嘢、幼身捲煙，同一啲唔知咩嚟嘅白色粉末。因為VIP房有閉路電視，將成晚過程影低晒，據報仲有人用手機，翻拍閉路電視畫面添。
不過關於影片內容，仍眾說紛芸。一則傳圈中人妻在VIP房內興奮得fing手fing腳起舞，又無端大叫，仲箍住其中一個男子，當眾激吻，與平時判若兩人；另一個女星就較低調，只係坐埋一邊，叼住支煙吞雲吐霧。
玩咗五小時，有指佢哋結帳時，有女子嫌收得貴，馬上發難仲大吵大鬧，又踢嘢，幾經擾攘先肯離開。
徐淑敏老公黃浩日前自爆娛圈涉毒案，越鬧越大。(資料圖片)
全站熱搜
留言列表
