Petbook

19歲中風貓針灸救命

2012年11月28日 ~~ 第1088期交易通．搵車快線

在寵物界，早幾十年間已經中西療法兼用來治理患病動物，如中醫的望、聞、問、切對寵物一樣適用，好似患有腎衰竭及胰臟炎還中過風的 19歲家貓 Sealine，就對針灸一點都不陌生，每 1至 2星期就在天后寵物醫院接受針灸治療，療養身子，現時 Sealine的胰臟炎已經治好，腎衰竭的情況亦得到改善。

Sealine全身插了十數支針， Denise笑說︰「㓤落去嗰陣佢只會 feel到少少麻痺。」係呀，你睇佢仲曉 chok住影相。

在寵物入院後，醫生會先用西醫的方法檢查寵物的身體狀況，才決定採用的治療方法。

中醫可以從舌頭上看出寵物的身體狀況，不過有時叫寵物開口都不容易。

針灸的針有不同長度，以適合不同大小的寵物，有些更可通電以作電療。

「𠵱家 Sealine病情已經穩定咗，佢成 19歲喇，針灸治療除咗控制佢腎衰竭嘅情況外，都想令佢精神啲，免疫系統好啲，主要施針會喺後腳同背部嘅穴位，好似太溪、腎俞、三陰交等，其實人都有呢啲穴位，不過寵物同人嘅位置始終有啲唔同。」天后寵物醫院的醫生 Denise說家貓 Sealine，自今年 8月發現有腎衰竭，主人 Maggie帶牠來針灸，記者眼見 Denise一針一針剌下，還以為 Sealine會反抗發惡，但只見牠悠然自得，十分乖巧。
施針完畢後， Denise說：「其實針灸用嘅針比打針用嘅針仲細，寵物只係會覺得少少麻痺，唔會有咩痛楚。 Sealine入嚟有嚴重腎衰竭同胰臟炎，身體脫水又食唔到嘢，佢年紀大，所以情況幾危急，我哋即刻餵佢食藥，吊鹽水控制病情，見佢開始穩定，我哋建議佢接受針灸治療，𠵱家胰臟炎已經好番，但要約 1至 2個星期返嚟做一次療程。」
Sealine的主人 Maggie說：「見 Sealine病到又屙又嘔，送到入嚟診斷係腎衰竭同胰臟炎，喺接受治療期間仲中埋風，全身唔郁得， Denis建議中西合璧，我本身都相信自然療法，於是決定試吓，療程針灸、食中西藥，打皮下水等，醫咗十幾日， Sealine竟然可以靠住牆慢慢行，嗰刻真係好開心，我見針灸幾有效，家都繼續畀 Sealine針灸，見佢已經活動自如。」

除了針灸，醫生會因應寵物情況調配草藥，配合治療。

在施完針後， Denise說︰「落完針後， Sealine就鍾意周圍行幾圈，只要唔整甩啲針，我哋唔會限制佢。」

主要治療筋骨病痛

動物針灸與人類針灸一樣，普遍應用於治療肌肉、筋骨等病痛，「寵物針灸多數應用喺痛症，好似哮喘、神經退化呢類長期病都有療效，基本上任何貓狗都可以接受針灸治療，不過最重要係睇番個病情適唔適合接受個療程，我哋會睇番之前嘅病歷同現場診斷先再決定，例如創傷性問題，好似骨折咁做手術會適合啲，如果隻寵物坐唔定同有攻擊性，都唔太適合接受針灸。」針灸治療每次約$350至$500。
寵物針灸正如 Denise所說給寵物可以多一種治療的選擇，亦可為寵物減肥，「近排醫過一隻約 6歲大嘅拉布拉多犬，佢嚟到醫院有成 36公斤重，過肥令佢嘅左前腳有退化性關節炎，行路會跛吓跛吓。西醫方面除咗做手術同畀止痛藥之外都冇咩辦法，但佢主人唔想開刀，於是搵我哋嘗試針灸療法。」

食太多乾糧易致肥

針灸通常會配合食療及草藥一起治療，「我哋會建議番主人唔好畀貓狗食太多乾糧，入面有碳水化合物，食得多就好易肥，中醫嚟講炎症可能係經脈瘀塞。」
現時香港沒有任何有關寵物針灸的課程， Denise就在美國和澳洲修讀了寵物針灸和草藥課程。「針灸治療其實有好耐歷史，幾千年前已經有記載中國用針灸嚟醫治馬同駱駝，而呢幾十年，西方國家都開始流行針灸醫治寵物，我讀完獸醫後，覺得學多樣療法，始終多樣技能傍身，而且可以畀多個選擇啲寵物，所以走去學，只要幫到寵物就係好方法。」

寵物針灸邊度學？

美國獸醫針灸基礎課程

正如 Denise所說，香港沒有寵物針灸治療課程，要到美國和澳洲等地修讀，但修讀前必修要先考取註冊獸醫的資格。

騷 GOODS
貓狗補品

如果寵物年紀大，或好多病痛，除接受中西醫治療外，平時可餵牠們吃補充營養食品，令身體更健康。

Aureo黑酵母營養液$520/30包
含有從菇菌類提煉出來的黑酵母，有助增強寵物免疫力，改善呼吸系統毛病。

Animal Nutrition Science營養補充劑$422/60粒
純天然成分，含有人參及茄紅素，可減低寵物患心血管病的風險，同時增加寵物的抵抗力。

Vets Kitchen消化酵素$238/300ml
含有益生菌同豐富纖維，改善寵物消化及吸引能力，當中加入雞汁調配，令寵物更易入口。